Спасувачката програма за излез на Кипар од финансиската криза може да изнесува околу десет милијарди евра, а не, како што досега се тврдеше, дека ќе изнесува 17 милијарди евра, изјави претседателот на Еврогрупата, холандскиот министер за финансии Јерун Дејселблум.
Тој наведе дека се погрешни досегашните тврдења дека Кипар ќе доби 17 милијарди евра. Но, не наведе детали за програмата, која утре ќе биде разгледувана.
Дејселблум посочи оти Русија може да помогне многу повеќе отколку досега.
Холандскиот Парламент денеска го одобри учеството на Холандија во спасувачкиот план за Кипар.