Една од најголемите британски компании „Бритиш-американ тобако“ (БАТ) е осомничена дека подмитувала политичари и функционери во јавниот сектор на неколку земји во Источна Африка.
Сомневањето дека овој британски тутунски гигант е вмешан во корупциски скандал го покрена екипа на новинари-истражувачи на Би-Би-Си, кои добиле на увид тајни документи од еден поранешен вработен на БАТ во Кенија.
Во специјалната емисија прикажана на британската телевизија, Пол Хопкинс, кој 13 години работел во компанијата, а пред заминувањето тајно ги снимил документите кои сега се доказ за подмитувањето, признава дека бил дел од нечесната работа.
– БАТ ги поткупуваше луѓето, а јас помагав, спроведувајќи ги дадените налози, изјави Хопкинс.
Тој сега вели дека почнал со давањето поткуп, откако во компанијата го увериле дека „тоа е цената за бизнисот во Африка“.
Според документите на овој „инсајдер“, компанијата има потплатено двајца сегашни и еден поранешен функционер во Светската здравствена организација (СЗО) од Бурунди, Коморските Острови и Руанда, ангажирани во одделот за контрола на пушењето, .
Сите тројца добиле тајни исплати во износи меѓу три и 20 илјади долари.
Хопкинс тврди дека тие биле подмитувани за да се поткопа кампањата против пушењето, но сите тројца ги отфрлаат сите обвинувања.
Претставник на БАТ за Би-БИ-Си изјави дека „компанијата нема да толерира корупција, без разлика на кое ниво таа ќе биде откриена“.
Британските закони за антикорупција овозможуваат „Бритиш-американ Тобако“ да биде обвинета и осудена за давање поткуп во кој било дел од светот, доколку се докаже вината за корупција.
БАТ би можела да плати многу висока казна за истото ова дело и во САД.