Магистралниот гасовод кон Битола ќе биде завршен до крајот на годинава, најави министерот за транспорт и врски Благој Бочварски, посочувајќи дека се прават напори и магистралниот гасовод до Гостивар да биде изграден и час поскоро да се затворат сите отворени прашања, во врска со експропријацијата на земјиште и другите проблеми кои се јавуваат на трасата.
– Работиме активно, средствата коишто се наменети за овие проекти се трошат и ги реализираме во капитални инвестиции. Така што час поскоро очекуваме да биде реализиран и овој крак кон Битола, а притоа и проектот од Гостивар кон Кичево и интерконекторот кон Грција, вели Бочварски.
Магистралниот гасовод од Куманово-Штип, Неготино, Кавадарци, Прилеп и Битола е 90 проценти реализиран.
Во меѓувреме Министерството за транспорт и врски и државното акционерско друштво НЕР работата на проектот за продолжување на кракот од Неготино до Гевгелија, кој ќе биде и интерконекторот со Грција, а исто така се работи и на поврзување на мрежата со Косово и со Србија.
Бочварски вели дека тоа се проекти што се важни за нашата држава, за да биде транзитна земја за пренос на гас, со што и државата и граѓаните ќе имаат придобивки, од аспект на добивање на евтин енергенс.
Постапката околу избор на фирма којашто ќе ја изврши секундарната гасификација во општините е во тек и ја води Министерството за економија.