Apple и Sony го објавија првиот трејлер за епската историска драма Наполеон, во режија на режисерот Ридли Скот.
Трејлерот беше прегледан над 10 милиони пати за помалку од 15 часа. Филмот доаѓа по неуспехот на последната историска драма на Скот „Последниот дуел“ во 2021 година.
Заплетот на филмот ќе се фокусира на подемот на Наполеон на власт и неговата нестабилна врска со царицата Џозефина. Филмот ќе прикажува и динамични борбени сцени низ кои може да се види воениот и тактичкиот план на Наполеон.
Главните улоги ги толкуваат оскаровецот Жоакин Феникс како Наполеон Бонапарта и Ванеса Кирби, позната по филмот Pieces of a Woman, како Џозефина.
Сценариото за филмот го напиша Дејвид Скарпа, кој работеше со Ридли Скот на филмот „Сите пари на светот“ од 2017 година. Филмот ја означува втората соработка на Скот со актерот Жоакин Феникс, кој глумеше во неговиот филм „Гладијатор“ од 2000 година.
Филмот ќе биде премиерно прикажан во кината на 22 ноември оваа година, а подоцна ќе биде достапен и на платформата за стриминг Apple TV+.