Утре почнува новиот книжевен фестивал „Друга приказна“ за мали фикции. Организаторите најавуваат дека манифестацијата ќе се одржува секоја година во јуни, а оваа година, поради „Шарената револуција“, главна тема на фестивалот е „Книжевноста и активизмот“.
„Време е за друга приказна. Не само општествено-политичка, туку и културна. Не само макро туку и микро. Затоа решивме да ја поттурнеме работата.
Фестивалот првенствено е македонски (што значи, не строго скопски!) и регионален, но има и европска димензија; гости на фестивалот често ќе бидат луѓе од Европа.
Фестивалот има цела низа цели; меѓу поважните се: популаризација на книжевноста; преиспитување на улогата на книжевноста во општеството; преиспитување на жанровските граници, на релациите меѓу „популарното“ и „елитното“, „високото“ и „ниското“, ангажираното и ескапистичкото; преиспитување на улогата на писателот во новите локални и глобални контексти; осмислување и практикување на нови стратегии за културни поврзувања, и локално и регионално и глобално; вмрежување на македонските автори и искуства во регионален контекст; збогатување на скопската културна понуда лете…
Поднасловот на фестивалот, Мали фикции, значи дека наш примарен интерес се малите книжевни форми, згодни за јавно и сценско споделување. Но, нè интересираат и хибридните книжевни форми, местата каде што книжевноста се среќава со музиката, графиката, медиумите, естрадата, теоријата…“, пишуваат организаторите на новиот фестивал.
Програмата и активностите на фестивалот ги одредува редакцијата: Јасна Котеска, Искра Гешоска, Никола Гелевски, Роберт Алаѓозовски и Иван Шопов.
Секоја година фестивалот доделува главна награда. Годинава добитникот е Давид Албахари, писател од Белград.
На фестивалот ќе учествуваат десетина странски гости, главно од регионот, и триесетина домашни учесници, писател(к)и, теоретичар(к)и и уметници.
Фестивалот ќе се одржува во Мобилна галерија во Паркот на Франкофонијата, а резервна локација е клубот ГЕМ во Старата чаршија.