Во Кинотека на Македонија утревечер и во недела од 20 часот ќе биде прикажан филмот „Аутсајдер“ на словенечкиот режисер Андреј Кошак по повод Прешерновиот ден кој се празнува во Словенија.
Покрај проекцијата, Кинотеката на Македонија и Словенечкиот центар од Скопје, во соработка со Амбасадата на Словенија во Македонија, утревечер на македонската публика ќе и овозможат и краток разговор со режисерот Андреј Кошак за неговиот филм.
„Аутсајдер“ е снимен во 1997 година и е поглед врз југословенската панк-сцена во Љубљана во 1980-тите години. Филмот своевремено бил дистрибуиран во сите републики на поранешна Југославија и добил повеќе меѓународни награди.
Настанот е во рамки на Месецот на словенечка култура во Република Македонија, кој го организира Словенечкиот центар од Скопје.