Под слоганот „Книга за сите генерации“, издавачката куќа Феникс, од денеска до 20-ти следниот месец, организира саем на книгата во своите четири продавници во Скопје.
На саемот, што се организира во месецот на книгата, ќе бидат презентирани над 10.000 наслови за возрасни и деца.
Меѓу понудените наслови се и книгите: „Феминизам“ од Андре Мишел, „Фројд“ од Ролан Жакар, „Антологиите на хорор и крими приказни“, „Јас сум гениј“ и „Ослободување на прстите“ од Салвадор Дали, „Љубов, убавина и слава“ од Енди Ворхол и многу други изданија.
На саемот ќе бидат изложени боенки, сликовници, енциклопедии, лектири за основно и средно образование, прирачници, хитови и бестселери.
Ќе биде промовирано и новото списание „Тренд филм“, а ќе се одржи и трибина на тема „Списанијата денес“ на која ќе бидат претставени и списанијата „Книжевна академија“ и „Учење низ игра“.