Во музеј-галеријата во Кавадарци синоќа беше отворена изложба на фотографии насловена „Свадбите во Тиквешијата некогаш и денес”. Изложбата ја организираа Фото-студио „Експрес” и кавадаречкиот музеј.
- Најстарата фотографија со која е овековечена една свадба ни е од 1913 година. Изложбата содржи 150 фотографии од повеќе автори, информираше директорот на музејот Петре Камчевски.
Меѓу фотографиите се и тие од свадбите на Васил Хаџиманов, Никола Бадев и други познати кавадарчани.
- Денес нашите клиенти се со многу поголеми барања, тие сакаат фотографиите да бидат репортерски, документарни и уметнички. Фотосесиите ги правиме не само во студио под светла, но и на несекојдневни локации, како во кругот на спомен-паркот посветен на 12 ваташки младинци. Работата е многу одговорна оти овој чин од животот на младите нема реприза. Порано филмот можел да се оштети, а сега картичката од дигиталниот апарат многу лесно може да се избрише ако не се внимава, рече Тони Коцев, еден од сопствениците на „Експрес”.