Со концерт на Македонската филхармонија насловен „Синтези“ на 28 март свечено ќе биде отворена годинашната манифестација „Денови на македонска музика“.
Концертот ќе го води диригентот Борјан Цанев и ќе бидат изведени народни македонски песни аранжирани и оркестрирани од македонските автори Александар Џамбазов, Илија Пејовски, Живојин Глишиќ, Драган Даутовски, Кокан Димушевски, Тодор Трајчевски, Сони Петровски, Горан Начевски, Дамјан Темков и Мајкл Бакрнчев.
– На концертот ќе бидат изведени бројни познати теми, меѓу кои: „Мори чупи Костурчанки“, „Кажи, кажи, либе Стано“, „Бор садила“, „А бре Македонче“, „Учи ме мајко, карај ме“, „По друм одам“, „Си заљубив едно моме“, „Јовано, Јованке“… а ќе настапат наши познати солисти: Драган Даутовски, Сузана Спасовска, „Леб и сол“, Ѓоко Таневски, Андријана Јаневска, Наде Талевска, Јана Бурческа, Иван Наумовски и други, информира Сојузот на композиторите на Македонија, организатор на фестивалот.
Концертот ќе се одржи во Македонската опера и балет со почеток во 20 часот. Влезот е бесплатен, а билети може да се резервираат на [email protected] или на тел.: 3119 824.
Манифестацијата „Денови на македонска музика“ се реализира под покровителство на претседателот на Република Македонија Ѓорге Иванов.