Под слоганот „Симнуваме капа“ (Hats off), од 22-ри до 29 септември во Битола ќе се одржува 39. Интернационален фестивал на филмска камера „Браќа Манаки“, за кое интензивно се прават подготовките, соопшти денеска на прес-конференција во Скопје раководството на фестивалот.
Повод беше соопштувањето на добитникот на „Златна камера 300“ за животно дело – британскиот оскаровец Роџер Дикинс, кинематографер на култни филмови како „Бегство од Шошенк“, „Фарго“, „Човекот кој не беше таму“, „Нема земја за стари луѓе“… и познат по соработката со браќата Коен. За неговата професионална биографија зборуваше уметничкиот директор на „Браќа Манаки“ Благоја Куновски-Доре во присуство на британскиот амбасадор Чарлс Гарет.
Директорката Гена Теодосиевска најави издание со голем број содржини и новитети – се зголемува бројот на фестивалски програми и оваа година ќе бидат 14. Годинава ќе има и нови селектори на филмските програми: Марија Џиџева ќе биде на документарната програма, Даријан Пејовски и Марија Апчевска – селектори на кратките филмови, Слаѓан Пенев – за програмата „Европски филмски перспективи“ која почна пред две години.
– ИФФК „Браќа Манаки“ е препознатлив како една специфична и автентична филмска територија, поради искрената почит кон маговите на визуелната креација на филмската уметност, кинематограферите, но и поради непосредноста на која наидуваат сите фестивалски гости, рече Теодосиевска, нагласувајќи дека да се поместуваат границите, не значи да се негира досега направеното. – Во една смисла значи промена, но не и отфрлање на позитивните искуства вклучени со години и градени со децении од оние кои ја почувствувале потребата да се основа и да се организира еден ваков фестивал и да се слави филмот во градот на браќата Манаки, рече директорката на фестивалот.
Претседателот на Друштвото на филмски работници на Македонија (ДФРМ) Игор Иванов-Изи истакна дека остануваат посветени на „Браќа Манаки“. Годинава, рече тој, фестивалот ќе го има своето „транзициско” издание во пресрет на големиот јубилеј догодина.
– Ние, филмските професионалци од Македонија, со 40-тиот „Браќа Манаки“ очекуваме нова ера на македонскиот филм. Почнавме стратегија за конечно расчистување на тоа што го стигматизираше и обременуваше филмот во Македонија, а се однесуваше на филмови кои тешко се продуцираа и се завршуваа, со чудни теми од историјата… Сакаме да го ставиме фокусот на младите автори и да снимаме филмови кои се случуваат овде и сега и зборуваат за нашите генерации и она што нас не опкружува, рече Иванов-Изи.
Соопшти и дека пред почетокот на 39-тиот ИФФК, ДФРМ ќе го заврши процесот за избор на македонски кандидат за Оскар и дека оваа година има дури осум или девет филмови кои би можело да бидат номинирани ако се исполнети условите. – Се надевам дека повеќе нема да се случи да немаме свој претставник за Оскар, рече претседателот на ДФРМ.
Плакатот за 39-тото издание на фестивалот, со слоганот „Симнуваме капа“ (Hats off), е креативно решение на маркетинг-агенцијата „Меккен Скопје“ и инспирирано од безвременските капи на браќата Манаки и градот во кој живееле и твореле. Капите лебдат врз еден препознатлив објект во Битола (Завод и Музеј), а пораката е благодарност за нивната работа и за сите што придонеле во градењето на фестивалот во изминатите речиси четири децении.