„Хомо“ на Игор Иванов-Изи во официјалната програма на фестивалот во Гоа

Од:

Играниот филм „Хомо“ на Игор Иванов – Изи е избран во официјалната програма на најважниот филмски фестивал во Азија, во индиската сојузна држава Гоа. Овој фестивал беше еден од ретките кој го одложи своето издание со цел да го одржи во живо во јануари, 2021, соопшти на денешниот брифинг директорот на Агенцијата за филм, Бојан Лазаревски.

Филмот „Хомо“ е во доминантна македонска продукција на „Скопје Филм Студио“ и е дел од широка копродукција со Косово, Бугарија и Хрватска.

– Филмот е сложена форма на уметност и продукција, каде творат најдобрите од најдобрите. Последните три години нашата земја демонстрира пример дека може да се успее, иако во оваа индустрија претходно долго време бевме речиси невидливи. Сега, македонскиот филм е исправен пред глобални предизвици, и сум благодарен на Владата што не ги изостави филмските работници во последниот пакет економски мерки, сепак се наоѓаме во услови на домашен скратен годишен буџет – она за што ќе се залагам е македонскиот филм да го одржи квалитетот и да продолжи да нижи успеси, истакна Лазаревски.

Изминатите три години, додаде тој, наш најголем амбасадор во културата беше токму филмот.

– Четири години по ред македонски филм е во официјална селекција на Санденс – најзначајниот фестивал за независен филм во САД, но и во светот. Во овој период, македонски филм беше присутен и на официјалната програма на Берлинале и влезе во историјата со двете номинации за Оскар. Годинава, која е предизвик за човештвото, филмската индустрија ја погоди во сите витални органи: филмските фестивали не се одржаа, кино салите се затворија, снимањата на филмовите се усложнија. Па сепак, филм во македонска ко-продукција повторно имаме на Санденс, присутни сме во официјална програма на фестивалот во Ротердам, а краткиот филм „Налепница” на Георги Унковски има преку 170 награди и е квалификуван за номинација за Оскар, заклучи Лазаревски.

Иванов – Изи посочи дека 51. Интернационален фестивал на Индија, кој традиционално се одржува во Гоа, е од А категорија.

– Оваа година фестивалот е поместен поради актуелните состојби и ќе се случува од 16 до 24 јануари. „Хомо“ ќе си ја има својата премиера во главната програма наречена „International panorama section“ каде е селектиран помеѓу илјадници пријавени филмови од целиот свет, рече Иванов – Изи.

Тој додаде дека фестивалскиот живот на „Хомо“ ќе продолжи, а прво „ќе ги зафати“ фестивалите кои се ослободени од препреката да имаат свое физичко издание, а потоа ќе се наврати во Европа со надеж дека до тогаш европските фестивали ќе се случуваат во нормално традиционално издание.

Би можело да ве интересира

Почна снимањето на филмот „Зад стоговите сено” во копродукција помеѓу Грција, Македонија и Германија

Ана Ололовска

Студенти од Куманово снимија долгометражен филм „Приказ“ во вонредни услови

Ана Ололовска

Објавен е официјалниот трејлер на филмот „Дара од Јасеновац“, српски кандидат за Оскар

Ана Ололовска

Србија: Државата ќе покрива најмалку четвртина од трошоците за снимање филмови и серии

Жарко Настоски

Светска премиера на „Хомо“ во јануари на 51. ИФФК во Гоа

Ана Ололовска

Доделени наградите на 49. Државен фестивал на непрофесионален филм

Ана Ололовска