Друштвото на ликовните уметници на Македонија (ДЛУМ) и Културно-информативниот центар-Скопје ги доделија годишните награди на изложбата „Мал формат“, на која се претставени дела на повеќе од 50 автори-членови на ДЛУМ.
Трите награди ДЛУМ им ги додели на уметниците: Никола Смилков – за вајарство, Мирослава Цветковиќ – за графика и на Христина Зафировска – за сликарство.
Културно-информативниот центар, каде што е отворена изложбата „Мал формат“, своите три награди им ги додели на авторите: Љупчо Бојаров – награда „Вангел Коџоман”, на Мирјана Крстева-Масетти – награда „Константин Мазев-Коце” и на Агрон Абдули – награда „Адем Кастрати”.
– Малиот формат како творечки предизвик е честа дневна практика на ликовните уметници. Магијата на „малиот квадрат“ во површина 25 на 25 сантиметри претставува искушение и за најголемите мајстори на визуелната уметност. Чувството на внатрешниот порив да го совлада малиот квадрат, на концизен, лапидарен, понекогаш метафоричен и езоповски начин да го транспонираат собитието и мотивот од големите форми во помалата мерка, информираше ДЛУМ по повод отворањето на изложбата.