Македонскиот филмски критичар Благоја Куновски е еден од членовите на жири комисијата на фестивалот Мостра што се одржува во Венеција од 27 август до 7 септември.
Куновски, како претставник на Македонија, по четврти пат членува во жирито на Федерацијата на филмската критика – ФИПРЕСЦИ.
Покрај него, во шестчленото жири се и ветеранот на британската филмска критика и критичар на лондонските весници „Гардиан“ и „Ивнинг Стандард“, Дерек Малколм, потоа Ева Пејдро од Шпанија, Јон Асп од Шведска, како и италијанските критичари Кјара Тоњолоти и Серџио ди Џорџо.
Жирито ќе ја додели наградата за најдобар филм од главната компетиција-Венеција 71, како и за најдобри филмови од паралелните програми, Хоризонти и за најдобар дебитански филм од Неделата на критиката.
Фестивалот беше отворен со првиот од 20-те селектирани филмови од најновата светска филмска продукција „Птичарот“ на латиноамериканскиот режисер Алехандро Гонзалес Инариту, кој е во трка за „Златниот лав на Венеција“.