Министерот за здравство Никола Тодоров, во рамки на работната посета на САД, потпиша Меморандум за соработка со реномираниот Универзитет на Калифорнија и Лос Анџелес (УКЛА), основан 1919 година.
Меморандумот, соопшти Министерството за здравство, покрај министерот Тодоров, го потпиша и Томас Розентал, главен управител на Центарот за меѓународна соработка при Универзитетот на Лос Анџелес.
Меморандумот ја дефинира соработката со Медицинскиот центар „Роналд Реган“, кој е во рамки на УКЛА, што претставува токму негова рамка, со цел македонските лекари и останатиот медицински кадар да имаат пристап до врвна обука, но и доктори од САД да доаѓаат и го пренесуваат своето знаење и искуство на македонските доктори, со можност за научна надградба што ги нуди оваа врвна здравствена институција, како и проширување на соработката со другите здравствени установи на тој Медицински центар. Тој е основан во 1955 година, а реотворен во 2008 година како Медицинскиот центар „Роналд Реган“ и е карактеристичен по обезбедувањето врвна грижа за пациентите.
Оваа болница, која е една од поголемите во Лос Анџелес, е врвна здравствена установа во светски рамки, со постигнати особени успеси во пресадувањето црн дроб, лекување болести од различни видови канцери, срцеви заболувања и друг вид тешки заболувања.
Меморандумот посебно ќе се фокусира на унапредување и развој на следните медицински области: кардиоваскуларна хирургија, неврохирургија, рехабилитација, ортопедија, трансплантација, неонатологија и педијатрија.
Со ова, успешно се заокружува посетата на министерот Тодоров на САД и овие медицински области во иднина ќе бидат на располагање на македонските лекари и медицинскиот кадар во Македонија за да го надградат своето знаење и развиваат нови медицински и административни вештини во најголемите медицински центри во САД.