Сефер Цановски, синот на бизнисменот и сопственик на комплексот „Космос“, во сведочењето за случајот „ТНТ“ на СЈО, рече дека ги молел бизнисменот Орце Камчев кој му бил сосед, и лидерот на ДУИ, Али Ахмети да влијаат кај Никола Груевски да не се урива објектот.
„Прв комшија ми беше Орце Камчев. Го замолив да разговара со таа власт, ако може да не одат на најцрното сценарио. Некој ден потоа ми беше кажано дека тој е близок со Сашо Мијалков, а не со Никола Груевски“, кажа Цаноски.
Сведокот кажа дека и Али Ахмети бил запознат со уривањето и дека лично му кажал оти објектот ќе биде урнат бидејќи татко му ја напуштил коалицијата со ВМРО-ДПМНЕ.
„Одговорот на Али Ахмети беше: Пред да дојдеш јас се слушнав со Груевски. Уривањето е поради тоа што татко ти ја напушти коалицијата со ВМРО-ДПМНЕ и отиде со СДСМ, а не дојде во коалиција со ДУИ…“, му кажал Ахмети на Цаноски.
На последната средба Груевски му кажал на Цаноски: „Што бараше со СДСМ?“
Според обвинението на СЈО, обвинетите во 2011 година сториле кривично дело од политичка омраза со уривање на комплексот „Космос“ на нивниот политички противник Фијат Цаноски.
Васко Маглешов