Пратеникот Антонио Милошоски од ВМРО-ДПМНЕ, не го сочека партискиот став и лично испрати известување до спикерот Талат Џафери.
Милошоски известува дека ќе учествува во јавна пропаганда за државниот референдум.
„Јас, Антонио Милошоски пратеник на ВМРО-ДПМНЕ, во координација со координаторот на пратеничката група на ВМРО-ДПМНЕ, ве известувам дека ќе земам учество во јавната пропаганда на претстојниот референдум со бојкотирачки став бидејќи сум против референдумското прашање, а бојкотот е загарантирана демократска опција за секој граѓанин“, пишува Милошоски, барајќи за ова да му се обезбедат средства.
Вчера Џафери испрати известување до координаторите на пратеничките групи и до пратениците кои не се организирани во пратенички групи во рок од три дена да одлучат и да го известат дали ќе учествуваат во кампањата и дали нивниот став за референдумското прашање е „за“ или „против“.
