Националниот Ромски Центар Куманово ги повика граѓаните да учествуваат на маршот посветен на жртвите на Холокаустот на Ромите. Маршот, најави извршниот директор на НРЦ, Ашмет Елезовски ќе се одржи на 3 август, а ќе започне во 9:30 часот, од пред Стара Пошта во Скопје.
– На маршот ќе бидат упатени пораки дека не смее да се заборави холокаустот на Ромите извршен пред 74 години. Се уште не е завршено обештетувањето на жртвите од холокаустот на македонските Роми кој е извршен во повеќе логори низ Европа, изјави Елезовски.
Според неофицијалните податоци околу 200 Роми од Македонија се жртви на Холокаустот, а од Куманово според податоците на НРЦ, имало дваесетина ромски семејства на кои им се губи секаква трага во виорот на Втората Светска Војна.
Елезовски истакна дека и по 74 години од Холкаустот насилството и антигиспизмот продолжуваат врз Ромите во цела Европа
– Човечноста, хуманоста, солидарноста се изгуби одамна, а се уште може да се каже дека Ромите се жртви на депортирање и прогони во повеќе држави, изјави Елезовски.
Вакви маршеви во чест на жртвите од Холокаустот и сегашните насилства врз Ромите ќе се одржат во повеќе градови од Европа.