Во четирите државни средни училишта во општина Гостивар започна уписот на новата генерација средношколци. За следната учебна година отворени се вкупно 1.904 слободни места.
Најмногу места има во средното техничко училиште (714). Во ова училиште предвидено е да се девет паралеки на албански, осум на македонски и четири на турски јазик. Полуматурантите можат да избираат повеќе струки: машинска, електротехничка, хемиско технолошка и други. Минимумот бодови за упис се движи од З0 до 55.
Во средното медицинското училиште, предвидени се 272 места, и формирање на четири паралеки на албански и по две на македонски и на турски јазик. Идните средношколци ќе бидат поделени во струките медицинска сестра и забен техничар. За упис во ова училиште минимумот на бодови е највисок 70.
Со минимум 60 бодови, во гостиварската гимназија може да се запишат 476 полуматуранти. Во ова средно училиште ќе се формираат девет паралелки на албански, три на турски и две на македонски јазик.
Во средното економското училиште има вкупно 442 места. На албански јазик предвидени се седум паралелки, на македонски пет и на турски јазик, една. Учениците може да избираат меѓу неколку струки: економски, банкарски, маркетинг или правен техничар и деловен секретар. Минимум бодови за упис во ова училиште потребни се 60 бодови.
Бројката во конкурсот на Министерството за образование и наука е иста како неколку години наназад. По завршувањето на уписите, предвидените слободни места не се пополнуваат и училишните управи со тешкотии ги формираат паралелките особено во техничките струки. Уписите ќе траат денес и утре.