Научна конференција на тема „Договорот за пријателство, добрососедство и соработка со Република Бугарија и перспективите за евроатлантска интеграција на Република Македонија“ денеска ќе се одржи во Македонската академија на науките и уметностите (МАНУ).
Организатори на конференцијата се МАНУ, Бугарската академија на науките во соработка со Министерството за надворешни работи.
Целта на конференцијата, како што соопштија организаторите, е да се проникне во улогата на овој Договор и неговото влијание на евроатлантските интеграции на Република Македонија и Западен Балкан.
Научната конференција ќе ја отворат претседателот на МАНУ академик Таки Фити, потпретседателот на БАН академик Васил Николов и државниот секретар во Министерството за надворешни работи Виктор Димовски. Излагања ќе имаат академици, професори и експерти.
Ќе биде претставена и Платформата за натамошна соработка на МАНУ и БАН во спроведување на Договорот за пријателство, добрососедство и соработка меѓу Република Македонија и Република Бугарија.