Министерот за информатичко општество и администрација Дамјан Манчевски очекува аргументирана и разумна дебата за Законот за медиуми во Собранието и негово скорешно донесување.
– Драго ми е што конечно законот влезе во процедура. Ние никогаш не бегаме од дебата и сакаме да разговараме со аргументи за предложените амандмани од страна на опозицијата. Се надевам дека ќе имаме аргументирана, но разумна дебата, која ќе не доведе во ситуација во разумно време да успееме да го усвоиме законот којшто конечно ќе ги донесе потребните реформи во медумскиот сектор, изјави денеска Манчевски, одговарајќи на новинарски прашања по отворањето на конференцијата за Отворено владино партнерство.
Во однос на ангажирањето на административните службеници вработени по Рамковниот договор, министерот Манчевски рече дека процесот на потпишување на договорите со 985-те административци е во тек и многу брзо се очекува распределбата и на останатите.