Снежни врнежи ги погодија денеска Велика Британија и Унгарија, предизвикувајќи сообраќаен хаос и доведоа до откажувања на летовите и затворање на училиштата.
Снегот го парализираше сообраќајот во некои места во западниот дел на Унгарија, а поради невремето во пет области е прогласена вонредна состојба.
Камиони потешки од 7,5 тони, стојат на границата со Словенија и не им е дозволено да влезат на територијата на Унгарија, јави државната новинска агенција МТИ. На западниот и северниот дел на Унгарија до утринските часови нападнале околу 40 сантиметри снег.
Поради снежните врнежи, од лондонскиот аеродром Хитроу, откажани се 180 летови, а повеќе од 2.000 училишта ширум островот се затворени.
Аеродромите се затворени и во Кардиф, Саутемптон и Бристол, објави АФП.
Поради снегот и мразот затворени се патиштата, има проблеми во железничкиот сообраќај, а не работаат и неколку стотини училишта.
Се очекува дека во некои области на земјата ќе се формира снежна покривка дебела до 30 сантиметри, како и дека највеќе снег ќе има во областите на јужен и западен Лондон.
Снежни врнежи, исто така прават големи проблеми и на жителите на Чешка и Словачка.