Најмалку 63 жртви има во поројните поплави што ја погодија југоисточна Шпанија, изјави за Ројтерс портпаролот на регионалната влада на Валенсија.
Поројните дождови предизвикани од студениот фронт што се движи низ јужниот и источниот дел на земјата во вторникот ги поплавија патиштата и градовите, поради што властите во најтешко погодените области ги советуваат граѓаните да останат дома и да ги избегнуваат сите несуштински патувања.
Големите поплави особено го зафатија регионот на Валенсија, каде поројните дождови предизвикаа хаос на патиштата. Службите за итни случаи работат на спасување луѓе од поплавените подрачја и потрага по исчезнатите.
Обилните дождови вчера ги поплавија патиштата и градовите. Многу автомобили завршија под вода, воз излета од шините и оштети куќи и згради.
Властите во најтешко погодените области ги советуваа луѓето да останат дома и да ги избегнуваат сите несуштински патувања.
Во Летур, во близина на Сиера де Сегура, 30 луѓе останаа заробени откако реката што минува низ градот се излеа од коритото.
Видеата на социјалните мрежи покажаа луѓе заробени во надојдените води, а неколкумина се држат до дрвјата за да не бидат однесени. Властите користеа хеликоптери за да спасат некои жители од нивните домови.
Радио и ТВ станици добија стотици повици за помош од луѓе заробени во поплавените подрачја или во потрага по најблиски, бидејќи службите за итни случаи не можеа да стигнат до сите погодени локации.
Брзиот воз со речиси 300 луѓе излета од шините во близина на Малага, но властите соопштија дека нема повредени. Невремето се предвидува да продолжи и утре, соопшти метеоролошката служба на земјата.
Научниците предупредија дека слични епизоди на екстремни временски услови, како што се поројни поплави или шумски пожари, се забележани на друго место во Европа во текот на летото. Тие ги поврзуваат со климатските промени предизвикани од човековата активност.