Во Собранието на Република Македонија денеска седници ќе одржат комисиите за транспорт, врски и екологија, за надворешна политика, за труд и социјална политика, за економски прашања и за финансирање и буџет.
Членовите на Комисијата за транспорт врски и екологија треба да дебатираат по првите читања од предлог-законите за изменување и дополнување на Законот за водите, за договорите за превоз во патниот сообраќај и за изменување и дополнување на Законот за електронските комуникации и предлог-законот за изменаување и дополнување на Законот за превоз во патниот сообраќај, во второ читање. На дневен ред на Комисијата се и Статутарна одлука за изменување и дополнување на Статутот на Агенцијата за регулирање на железничкиот сектор (прва и втора фаза) и Годишната програма за работа на Агенцијата за електронски комуникации за 2013 година.
Комисија за надворешна политика предвидено е да го слушне претставувањето на платформите за дипломатски активности на новоименуваниот амбасадор на Република Македонија во Обединетото Кралство на Велика Британија и Северна Ирска, Јован Донев, на новоименуваниот амбасадор на Република Македонија во Кралството Шпанија, Слободан Чашуле, како и да ги разгледа предлог-законите за ратификација на Договорот меѓу Република Македонија и Република Србија за правна помош во граѓански и кривични предмети и за изменување и дополнување на Законот за надворешни работи. На дневен ред се и предлог-законите за ратификација на Договорот за економска и техничка соработка во областа на инфраструктурата помеѓу Владата на Република Македонија и Владата на Народна Република Кина и за ратификација на Амандман на Статутот на Меѓународната финансиска корпорација.
На дневен ред на Комисијата за труд и социјална политика е предлог-законот за посебните права на припадниците на безбедносните сили на Република Македонија и на членовите на нивните семејства, по скратена постапка, поднесен од пратеници од владејачката ВМРО-ДПМНЕ.
Комисија за економски прашања треба да го разгледа предлог-законите за изменување и дополнување на Законот за стандардизација во прво читање.
Првото читање на предлог-законот за изменување и дополнување на Законот за јавен долг поднесен од пратеници од опозициската СДСМ е на дневен ред на Комисија за финансирање и буџет.