Агенцијата за медиуми ја запре постапката за одземање на дозволата за работа за телевизија „Алфа“. На седницата одржана минатата седмица Советот на Агенцијата донесе пет решенија за запирање на покренатите постапки за одземање на дозвола за телевизиско и радио емитување на следниве радиодифузери: ТРД Радио Канал 77 ДООЕЛ Штип, ТРД Радио Фама ДОО Тетово, ТРД Алфа ТВ ДООЕЛ Скопје, ТРД Лалг Радио ДООЕЛ Скопје и ТРД ТВ СКОПЈЕ ДОО Скопје. Телевизијата за дозвола за работа должеше 3,5 милиони денари.
Согласно Законот за аудио и аудиовизуелни медиумски услуги, Советот е должен да почне постапка за одземање на дозволата на секој радиодифузер кој нема да ја плати фактурата за радиско или телевизиско емитување во рок од 30 дена од денот на добивање на фактурата. Откако ќе се почне постапката, на радиодифузерите им се дава рок од 15 дена да ги подмират обврските.
В. М.