На три јавни седници апелационите судии денеска одлучуваат дали да им биде укинат продолжениот притвор на осомничените за крававиот четврток.
Разрешениот ексначалник во МВР, Оливер Поповски, преку адвокатите поднел жалба на решението за продолжување на притворот за нови 30 дена. Адвокатот на Поповски, Ставре Џиков побара куќен притвор или поблаги мерки за обебедување на присуство. „Поповски имал значајна функција во МВР. Тој е личност кој немал престап и прекршок“, рече Џиков пред тричлениот судиски совет. Според него, се врши политичка „урамниловка“ со притворите. „Судот е политички превртлив, а вие со вашата одлука таа перцепција може да ја смените“, истакна Џиков.
Дилавер Бектеши од Вишото јавно обвинителство рече дека осомничениот може да избега, да влијае врз сведоците и останатите осомничени. „Нема основа за укинување на притворот“, рече Бектеши. Конечната одлука судот треба да ја објави деновиве.
Жалба за притворот покрај Оливер Поповски, поднеле и актерот Владо Јовановски, Горан Ѓошевски, поранешниот шеф на обезбедувањето на Трајко Вељаноски и Мунир Пепиќ од Агенцијата за разузнавање. Судот пред новогодишните празници им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директор на Бирото за јавна безбедност, Митко Чавков, на организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието.
В. Маглешов