Оставките на претседателот на Државната изборна комисија, Александар Чичаковски и на членовите предложени од СДСМ, Виолета Дума и Игор Милев, се порака која Владата сака да ја испрати до јавноста дека прифаќа критики и оти нема да практикува неодговорно однесување, изјави денеска министерката за одбрана Радмила Шекеринска.
– Ова е порака, која тие и ние ја испраќаме до јавноста дека прифаќаме критики, дека критиките можат да бидат позитивни и дека таквото однесување оваа Влада нема да применува, ниту пак го прифаќа. Презедовме обврска тоа да го покажеме и во нашето секојдневно однесување. Го поздравувам нивниот гест и сметам дека тоа е поука за сите избрани личности во Македонија, за сите кои ја добиле нашата доверба, вклучувајќи не и нас самите, рече Шекеринска, одговарајќи на новинарско прашање во врска со случајот со бонусите во износ од 12 плати кои си ги поделиле членовите на ДИК.