Примена на технолошки решенија во Република Македонија за третман на отпадот при што како резултат се добива енергија беше во фокусот на панел дискусија на тема „Од отпад до енергија – предизвици и можности” што денеска се одржа во Скопје во рамки на Европската недела за намалување на отпадот.
На дебатата во организација на Министерството за животна средина и просторно планирање и Здружението на граѓани „Гоу Грин“ со свои искуства се претставија ИНА Енерго Систем Скопје, македонски партнер на италијанскиот конзорциум “Еко Енерџи”, компанијата Везе Шари и Лекер и Цементарница Усје АД Скопје како добри примери за различно искористување на комуналниот отпад за добивање на енергија.
– Македонија навистина може да се пофали со примери кои се и регионално оценети како добри примери и кои овозможуваат не само да станеме енергетски понезависни, туку на тој начин да придонесеме кон намалување на аерозагадувањето, рече заменик министерот за животна средина и просторно планирање Јани Макрадули.