Времето денеска ќе биде претежно сончево, со утринска температура од -3 до 6, а дневна од 12 до 20 степени.
Попладне облачноста ќе се зголеми. Ќе дува умерен, во западните делови засилен западен ветер, особено изразен на планините. Кон крајот на денот и во текот на ноќта повторно ќе има продор на студена воздушна маса од север со засилен северен ветер, а во северните и западните делови ќе има слаби локални врнежи од дожд, на планините од снег, но не се очекува врнежите да бидат обилни.
Во Скопје претпладне сончево, попладне облачноста ќе се зголемува, а во текот на ноќта ќе има повремени слаби врнежи од дожд и ќе почне да дува засилен северен ветер. Температурата ќе се движи од два до 18 степени.
Утре преку ден облачноста ќе се намали, а од вторник времето ќе биде претежно сончево и студено со ниски утрински температури кои на повеќето места ќе се спуштат под нулата.
