Кошаркарите на МЗТ Скопје Аеродром ја забележаа втората победа оваа сезона во АБА-лигата, откако синоќа во Лакташи со фантастична игра во нападот ја совладаа фаворизираната Игокеа со 108:99.
Во последниот дуел од 4. коло во регионалното натпреварување, триумфот за македонскиот шампион беше сосема заслужен, бидејќи „сино-белите“ водеа во најголемиот дел од средбата. Шутот беше на високо ниво со дури 13 постигнати тројки и 60-отстотна прецизност во ударите за два поени, а МЗТ доминираше и во скокот со дури 22 скока повеќе во однос на противникот (46:24).
Дамјан Стојановски постигна 23 поени и тоа по перфектното прво полувреме во кое реализира 17 поени без ниту едно промашување од поле (7/7). Јордан Минчев блесна со 19 поени, Бојан Трајковски и Бред Бејли реализираа по 17, а Јуре Лалиќ застана на 14 поени.
„Штрковите“ веќе утре ќе го пречека тимот на Шкупи во меч од 2. коло од домашната Првата лига, а следен противник во АБА-лигата му е тимот на Цибона, кој следниот понеделник ќе гостува во „Јане Сандански“.