Мојата цел е да ја направиме Македонска Каменица подобро место за живеење, посакувам нашата општина економски да се развива, демократски да созрева и да претставува место каде се негуваат вистински вредности, истакна на прес-конференција попладнево, кандидатот за градоначалник на Македонска Каменица од СДСМ, Соња Стаменкова.
– Целиот живот, додаде, сум меѓу моите сограѓани, а посакувам и нашите деца да ја гледаат својата иднина тука. – За мене да се биде градоначалник е привилегија, но и огромна обврска. Обврска дека само граѓаните и никој друг ќе бидат во фокусот на моето внимание. Во една од најбогатите општини во државата, живееме просечно а можеме многу подобро, истакна Стаменкова.
Таа потенцираше дел од проектите предвидени во програмата.
– Вашиот глас даден за нас значи слобода, единство, чиста вода за пиење, враќање и задржување на младите во Македонска Каменица, подобро платени работни места, отворање бизнис центар, развој на спортот, развој на индустриска зона, отворена и услужна општина за сите, рече Стаменкова, апелирајќи на масовна излезност на изборите и поддршка на нејзината кандидатура и советничката листа.
