Во просториите на Агенцијата за остварување на правата на заедниците (АОПЗ) се одржа работен состанок со дел од невладините организации на ромската заедница во Македонија.
На состанокот директорот Илхан Рахман ги информираше присутните за состојбата на Агенцијата, за планираните активности во наредниот период, заложбата да се подигне видливоста на проблемите на етнички заедници во општеството, а воедно и вклучувањето на невладините организации во тој процес.
Заменик директорот на АОПЗ, Џелал Хоџиќ, во своето обраќање до присутните зборуваше за заедничките проблеми на заедниците во остварувањето на правото на образование на мајчин јазик, како и потребата за квалитетна медиумска програма на јазиците на заедниците.
На состанокот стана збор за проблемите на ромската заедница од областа на остварувањата на правата во образованието, културата, правичната застапеност и потребата за зајакнување на капацитетите на граѓанскиот сектор. Посебен акцент беше ставен на дискриминацијата кон Ромите во општеството, како и проблемот на луѓето кои не се евидентирани во матичните книги.
Дел од невладините организации порачаа дека се потребни итни решенија за проблемите на ромската заедница во општеството. Хоџиќ во име на Агенцијата изрази подготвеност за работа на заеднички проекти заедно со невладините организации.