Ќе се погрижиме да издвоиме доволно средства во буџетот за наредната година со цел сите деца кои имаат потреба да го добиваат хормонот за раст, изјави денеска заменик-министерот за здравство Гоце Чакаровски.
Тој присуствуваше на одбележувањето на Светскиот ден за подигнување на свесноста за растот кај децата под мотото „Кога зборуваме за висината, зборуваме за здравјето“ во организација на Здружението на родители на деца со ендокринолошки заболувања Раст.
– Не би сакале да правиме дискриминација односно поедини деца да го примаат тој хормон, а поедини да чекаат додека некој не заврши со лекувањето. Ќе поведеме грижа тие да имаат ист третман, посочи Чакаровски.
Додаде дека како Министерство во овие изминати два месеци се отворени за соработка со сите невладини организации и здруженија на пациенти со цел да постигнат поголема ефективност и продуктивност односно да креираат здравствени политики во интерес на пациентите.
Претседателот на Здружението, Александар Петровски, рече дека во Македонија сто деца со нарушен раст можат да се лекуваат.
– Времето за чекање за лекување е долго и зависи од тоа кога ќе се ослободи место од постојните деца на терапија и од тендерските постапки кои траат многу долго, се доцни со објавување на тендерите, се заглавуваат во советите за јавни набавки и како краен резултат е често пати децата да се соочуваат со паузирање кое е недозволливо. Заради задоцнетите технички постапки на Детската клиника веќе следините денови дваесеттина дечиња ќе останат без хормонска терапија за раст, рече Петровски и додаде дека мора да се најде начин за набавка која нема да зависи од тендери.
Тој упати порака до родителите и старателите да ја контролираат висината на детето барем два пати годишно, да бараат од матичните педијатри и семејни лекари бројот од добиените сантиметри да го внесат во табелата со крива за раст која покажува каде е висината на детето во однос на очекуваната нормална висина за неговата возраст и да консулираат лекар ако забележат дека детето носи ист број облека подолго од една година, ако е пониско од неговите врсници, децата на помала возраст…
– Нашите барања се да се изготви национален регистар на пациенти со нарушувања на растот, подигнување на терапијата на три месеци, терапија за сите деца кои имаат потреба од лекување, изнаоѓање систем кој нема да зависи од тендерски набавки кои доцнат и зависат од советот за јавни набавки, додаде Петровски.
На прес-конференцијата присуствуваа и директорот на ЈЗУ Здравствен дом Скопје, Злате Мехмедовиќ и проф.д-р Елена Шукарова од Универзитетската клиника за детски болести.
Медицински екипи на ЈЗУ Здравствен дом Скопје на плоштад Македонија денеска бесплатно мереа висина и тежина на деца кои сакаа да проверат дали нивната висина е соодветна за возраста.