Шефот на иранската нуклеарна програма Али Акбар Салехи ги обвини денеска САД дека се обидуваат да го поткопаат нуклеарниот договор со големите сили од 2015 година, барајќи од Обединетите нации да се спротивстават на „неприфатливите барања“ на Вашингтон.
– Американската администрација има претерано непријателски став, со мерки и политика за поткопување на нуклеарниот договор, кои се во спротивност со духот на спогодбата, изјави Салехи во Виена.
Тој ја критикуваше американската пратеничка при ОН, Ники Хејли дека минатиот месец, за време на преговорите со шефот на Меѓународната организација за атомска енергија (МААЕ) Јукиј Аман, изнела „многу неоправдани, специфични барања“.
Меѓу тие барања било и МААЕ да ги истражи воените подрачја во Иран, што официјален Техеран ги одби.
Министерот за енергетика на САД, Рик Пери на состанокот во Виена истакна дека Вашингтон „нема да прифати лошо спроведена или несоодветно надгледувана работа“.
Меѓутоа, како што истакна Салехи, барањата на Хејли биле многу над договорот.
– Остануваме уверени дека Меѓународната организација за атомска енергија и нејзиниот директор ќе останат имуни на неприфатливите барања, посочи Салехи на годишниот состанок на државите членки на МААЕ.