СДСМ во реакција на соопштение на ВМРО-ДПМНЕ наведува дека државните пари се користат за потребите на граѓаните.
– Владата предводена од СДСМ преку домаќинско и одговорно работење го стабилизира јавниот долг кој за првпат е намален после 2008 година. Парите на граѓаните повеќе не се трошат за криминално богатење на Груевски и фамилијата, туку за повисока минимална плата, покачување на пензиите, за решавање на проблемот со стечајците и за нови мерки за вработување, наведуваат од СДСМ.
Додаваат дека ВМРО-ДПМНЕ секојдневно пласира лажни вести и манипулира со граѓаните, свесно мешајќи го издавањето на државни хартии од вредност и промените на девизните резерви. Станува збор, појаснуваат, за редовна пракса за плаќање од единствената државна сметка на доспеани рати за кредити, камати и стари долгови направени токму од претходната власт на ВМРО-ДПМНЕ.
Како пример го посочуваат враќањето на кредитот од 2012 година од Дојче Банка тежок 77,3 милиони евра.