Во завршна фаза е реконструкцијата на кумановското основно училиште „Вук Караџиќ“, со која се очекува да се замени столаријата и кровот на училишната зграда.
Амбасадата на Јапонија, додели 67.830 евра наменети за реновирање на кумановското основно училиште, односно за замена на прозорците од вториот и третиот кат од училиштето, како и на кровната конструкција.
Преку овој проект, Владата на Јапонија го финансира целосното реновирање на кровот на училиштето, набавката на нови и замена на старите прозорци, со што значително ќе се подобри безбедноста на учениците, а ќе се подобри и загревањето на училишните простории.
– Реконструкцијата започна при крајот на јуни годинава, а во моментов се работи на кровот и на замена на прозорците во ходниците. Се надевам дека учениците со почетокот на учебната година ќе добијата енергетски поефискана и безбедна средина за учење, изјави директорката на училиштето Надица Петровска.
По завршување на проектот, надлежните од училиштето, планираат да ги заменат прозорците на приземје и првиот кат, како и реконструкција на прозорците, за што средства ќе побараат од Министерството за образование. Истовремено, менаџерскиот тим планира и обнова на фасадата, за што, како што рече Петровска, ќе се обидат да најдат и донација.
Во училиштето настава следат 148 ученици, но со подобрувањето на условите, таа очекува идната година да се запишат поголем број ученици.