Повеќекратниот шампион на Италија и поранешен европски првак екипата на Милан вечерва допатува во Скопје, каде утре го игра реванш дуелот од баражот од Лига Европа против тетовска Шкендија. Милан на првиот дуел постигна висока победа од 6:0, а „миланезите“ по доаѓањето во хотелот „Мериот“ во Скопје одржаа и прес конференција.
– Допатувавме со комбиниран тим, а утре ќе има и некои измени во составот, не дека го потценуваме ривалот, туку од причина што за Милан секој натпревар е важен и до декмеври овој тим ќе игра на секои три дена. Јасно е дека се гледаме како дел од групите од Лига Европа и посакуваме уште еден триумф, изјави тренерот на Милан Винченцо Монтела.
Според најавите екипата на Милан, нема да има тренинг во Скопје, а дуелот со Шкендија на Националната Арена „Филип Втори“ се игра утре со почеток во 20:45 часот.