Активни пожари денеска има во селата Заграт и Грашница во Македонски Брод, во местото Јасеновска глава во Чашка, во селото Никодин и местото Слива, Прилепско, над селото Копанце во Тетовско, како и кај село Градманци, Општина Петровец, соопшти Центарот за управување со кризи (ЦУК).
Нема опасност од нивно проширување зашто главно горат нискостеблеста шума и сува трева, а екипите се постојано на терен и соодветно дејствуваат.
Како што информира Надица Вчкова од ЦУК на прес-конференција, пожарите во останатите делови од Македонија се локализирани и ставени под контрола.
– Состојбата на терен постојано се следи, а надлежните заседаваат со цел ефикасна координација на активностите за гасење на пожарите. Уште еднаш апелираме, граѓаните да внимаваат при работа и движење на отворено, како и да ја почитуваат забраната за движење низ шумите. Казната за непочитување на овие мерки е од 1.500 до 2.000 евра, додека за потпалување на шумите е многу повисока, рече Вчкова.
Во Општина Македонски Брод се локализирани пожарите во атарите на селата Близанско, Калуѓерец, Могилец, Растеж и Волче, додека во атарот на село Заграт малото жариште кај местото Секулово гумно вчера беше локализирано, но денеска, поради силен ветер, се разгоре.
Активен, но локализиран е и пожарот кај село Никиштани, Ѓорче Петров, а под контрола се ставени и пожарите над село Бањиште кај Дебар, како и кај село Галиште, Кавадаречко.
Според Драги Тарчуговски, за гасење на пожарите во Скопско, од денеска е вклучена и израелската помош. Изгаснат е кракот кон Градманци, Катланово, кој зафатил зеленика, нискостеблеста и дабова шума. Останува уште кракот во правец на селото Чифлик каде се дејствува и од воздух и од земја.
Кризната состојба во Македонски Брод и Чашка што беше прогласена во неделата останува на сила до 8 септември.