Шестнаесет авганистански полицајци се убиени вчера во невнимателен американски воздушен напад во провинцијата Хелманд, пренесоа француските медиуми, повикувајќи се на полициски извори.
Претходно денеска Пентагон потврди дека во американски воздушен напад врз цел во авганистанската провинција Хелманд, по грешка, биле убиени дванаесет авганистански полицајци, а двајца биле ранети, пренесоа американските медиуми.
Во соопштение на Пентагон се наведува дека во вчерашниот невнимателен воздушен напад, како дел од операцијата за поддршка на САД во борбата против талибанските бунтовници во регионот,била погодена зграда на полицијата .
Во соопштението се искажува и жалење до најблиските на убиените полицајци.
Поголем дел од провинцијата Хелманд е под контрола на талибанците, со кои авганистанската армија и полиција водат жестоки борби за враќање на територијата.
НАТО и САД се воено присутни во Хелманд како поддршка на авганистанските сили.
Началникот на полицијата во областа Герешк, Абдул Гафар Сафи, за американските медиуми изјави дека убиените полициски офицери, заедно со авганистански војници, учествувале во операции против талибанците во регионот. Тие не биле во униформи, поради што, по грешка, веројатно биле сметани за талибански борци, додаваат американските медиуми.