Петмина воени команданти на португалската војска се сменети по грабежот на оружје, експлозив и муниција од военото складиште на армијата во местото Танкос, северо-источно од главниот град Лисабон.
Командантите се сменети на почетокот на истрагата што ја отвори армијата, но првите сознанија навестуваат дека тие не биле во директна врска со грабежот и со неговите извршители.
Португалскиот претседател Марсело Робело де Соуза го оцени грабежот како тежок инцидент и побара поширока истрага за целиот случај.
Во соопштението од неговиот кабинет се посочува дека треба да се испитаат и можните врски на крадците со други земји-членки на НАТО, но не се споменува за кои земји станува збор.
Локалните медиуми пишуваат дека грабежот бил откриен на 28 јуни и деталите за него и за тоа што е украдено, биле веднаш пренесени на сите земји-членки.
Владата во Лисабон и Министерството за одбрана го карактеризираа случајот како „сериозен“, но не изнесуваат детали за тоа што е одземено.
Интернет весникот „Еспањол“, што излегува во Шпанија, единствен засега открива детали од списокот на украденото оружје и муниција, предупредувајќи дека се одземени 150 рачни гранати, 44 антитенковски гранати, 102 експлозивни полнења, 264 парчиња пластичен експлозив и околу 1.500 парчиња со 9-милиметарска муниција.
Весникот пишува дека деталната листа со украденото оружје им била предадена на шпанските специјални сили за антитероризам.