Тимот на МЗТ Скопје Аеродром за играчи до 19 години и официјално се пријави за настап во новоформираната јуниорска регионална кошаркарска АБА лига, која се очекува да стартува во текот на претстојната сезона.
– Тоа ќе биде одлична можност за талентите од нашиот клуб да ги одмерат силите со најдобрите врсници од просторот на поранешна СФР Југославија и да одиграат 10-14 натпревари преку кои ќе добијат шанса за надградба и напредок. Засега не е дефиниран принципот според кој ќе играат јуниорските тимови, но тоа најверојатно ќе биде со поделба во две групи и со играње секој со секого на два турнири кои ќе бидат одиграни на различни места, информира македонскиот шампион.
Конечниот број екипи што ќе учествуваат во новата У-19 лига на АБА ќе биде познат на почетокот од следниот месец, по што ќе биде објавен изгледот на групите и начинот на кој ќе се игра.
МЗТ Скопје Аеродром воедно изрази желба и подготвеност да биде домаќин на еден од турнирите во групната фаза.