Српскиот претседател Александар Вучиќ изјави дека сака да иницира општествен дијалог за Уставот и односите кон Косово, како и за односите кон регионот, јави Танјуг.
Тој за Радио Слободна Европа изјави дека тој дијалог ќе трае три, шест или повеќе месеци.
– Така ќе се види каде е нашата политика, каде ја гледаме Србија во следниот период и каква е политиката, за која се бориме и каква е нејзината содржина, нагласи Вучиќ, додавајќи дека тоа се „сериозни и одговорни работи“.
– Кога стратешки ќе ја поставите целта, можете да го пронајдетет патот. А тоа што ние се возиме тука, но не знаеме каде ќе паркираме на крај, тој пристап не може да донесе добар исход, рече српскиот претседател.
Според него решенијата на Белград за прашањето за Косово треба да бидат усогласени со проблемите од суштинско значење и со она што ги „угнетува Србите на Косово“.
Говорејќи за измени на Уставот, Вучиќ рече дека на таа тема е неопходно да се разговара.
Тој нагласи дека сака да ги постави дискусиите на рационално ниво.