Советот за развој на пелагонискиот плански регион со кој претседава градоначалникот на општина Ресен Ѓоко Стрезовски, денеска во Битола ја претстави најновата донација од јапонската амбасада за регионот, багер за чистење на речните корита и канали.
Пелагонискиот плански регион е силно издигнат над локалните критериуми и фокусиран на проектите од регионално значење, изјави Стрезовски на прес-конференцијата што се одржа во Битола.
– Посебни успеси постигнавме во руралните општини каде реализацијата на проектите беше многу ефикасна. Во меѓувреме добивме и поддршка од јапонската амбасада која за пелагонискиот регион додели грант од 70.000 евра за набавка на багер за чистење на речните корита и каналите со што ќе се подобри можноста за справување со евентуални поплави во деветте општини од пелагонискиот регион, потврди Стрезовски.
На денешната редовна седница на Советот за развој на пелагонискиот плански регион беа усвоени извештајот на програмата за работа на Центарот за развој на пелагонискиот регион-ЦРППР со седиште во Битола.
– Во моментов ЦРППР има одобрени над 400.000 евра за различни проекти со регионално значење од различни донатори како што се реконструкцијата на зелениот пазар во Демир Хисар, реконструкција на сала за културни настани во општина Долнени и набавка на против пожарно возило во општина Крушево, најави Емилиа Ѓероска, директорка на ЦРППР.