Демократската унија за интеграција денешните изборни активности ги почна во Дебреште во општина Гостивар каде се обрати лидерот на партијата и носител во Шестата изборна единица Али Ахмети.
Тој пред жителите на Дебреште истакна дека ДУИ не сака да води еуфорична политика, туку да остане рационална бидејќи, како што рече, пред нив се поставуваат должности со голема одговорност.
– ДУИ има подготвени кадри во сите област. Заштитник на каузата на Албанците е ДУИ, субјект кој извира од обединувањето на сите родољубиви и воени сили од последните децении, посочи Ахмети.
Шефот на Централниот изборен штаб, Беким Незири рече дека малите опозициски партии имаат една цел, а тоа е рушење на ДУИ. – Политиките на Али Ахмети, се единствени визионерски политики. ДУИ е единствениот политички субјект со јасна национална визија. Обидите за раздор на албанскиот глас, треба да внимаваме во чиј прилог одат, рече Незири.
Лидерот на партијата имаше и средба со пензионери и аџии од општина Чаир пред кои нагласи дека ДУИ има платформа со конкретни проекти. Ахмети посочи дека и досега се реализирани многу проекти, но оти и во иднина ќе се реализираат многу проекти со кои ќе се подобри животот на граѓаните.
– Досега се направени дела кои остануваат богатство и благо за сите Албанци, како универзитети, болници, инфраструктура, училишта, споменици… Така и ќе продолжиме. Ќе продолжиме со реализација на многу проекти, рече Ахмети.
Демократската унија за интеграција вечерва ќе ја продолжи изборната кампања во Куманово каде ќе се одржи централниот собир во Домот на културата.