Министерот за одбрана на Република Македонија Зоран Јолевски денеска, по повод 23 Октомври, Денот на македонската револуционерна борба, упати честитка до вработените во Министерството, припадниците на Армијата на Република Македонија и до сите граѓани на Македонија.
– На денешен ден ја славиме мислата, идејата за слободна, независна и самостојна Македонија. Денес го славиме идеалот кој го водел животот на генерации Македонци. Но, денес се потсеќаме и дека ние имаме морално право и обврска да дадеме сè од себе за да го зачуваме и развиеме она што го имаме – слободна Република Македонија, еднаква и рамноправна со останатите држави во светот, вели Јолевски во честитката.
Армијата на Република Македонија, истакнува министерот, е токму оној дел од општеството чија задача е зачувување на територијалниот интегритет и суверенитет на нашата татковина.
– Нашите припадници неуморно, во континуитет ги заштитуваат граѓаните на Македонија, особено во времиња на глобални промени и предизвици по безбедноста. Тие стојат цврсто бранејќи ги не само идеалите на нашите предци, туку и современите вредности кои ние ги живееме, додава министерот Јолевски.