Истражителот на СЈО кој по заминувањето на обвинителите остана да дежура во УБК е избркан од Управата, а друг е приведен во полициската станица Беко каде пристигна специјалната обвинителка Катица Јанева.
– Го избркале истражителот од МВР. Во моментов уште е во дворот на МВР. Ќе одам да видам која е ситуацијата и што е тоа со неговото бркање. Ние сме должни да бидеме таму, рече Јанева во интервјуто на Телма, и додаде дека веднаш по интервјуто ќе оди да види што се случува.
Претходно, таа рече дека истражители ќе останат во Управата се додека СЈО не го добие и останатиот дел од податоците за прислушувањето, за кои се чека надворешен експерт.
Наместо во МВР Катица Јанева се упати во полициската станица Беко, каде втор истражител е приведен од страна на полицијата.
Јанева најави и дека ќе поднесе кривични пријави за сите што ја попречуваа нејзината работа при влезот во УБК.
– Сите опструкции се запишани и врз основа на доказите ќе покренеме соодветени постапки против овластените службените лица. Не се само тројца, многу повеќе се, рече Јанева.