Централниот депозитар за хартии од вредност и натаму не се изјаснува околу дилемите во случајот „Макпетрол“. Директорката на Депозитарот, Елена Јакимовска Петровска продолжува да избегнува да ги објасни клучните аспекти од процедурата и не соопштува дали е валидна банкарската гаранција на „Балкан Петролеум Холдинг Лимитед“ – анонимната компанија која сака да го преземе Макпетрол.
„Немаме никаков коментар околу банкарската гаранција во оваа фаза на постапката. Таа е само еден од документите кои понудувачот мора да ги достави во постапката“, вели Јакимовска Петровска.
Директорката на Централниот депозитар за повеќето од отворените прашања околу целиот случај ја префрла одговорноста кај Комисијата за хартии од вредност. Ваквиот сомнителен молк и натаму го обвива случајот „Макпетрол“ во мистериозност и ги засилува стравувањата дека е можно институциите да го штитат сомнителниот капитал од странство и премолчено да дозволуваат негов влез во македонското стопанство.
Во јавноста уште од самиот почеток се појави прашањето: како е можно компанија која е основана со почетен влог од само 1.000 евра и постои неполн месец, да обезбеди банкарска гаранција од 47.5 милиони евра? По ова, медиумите објавија дека „БПХЛ“ воопшто ја нема обезбедено гаранцијата, која е законски предуслов за откуп на акциите. Но, од Централниот депозитар и натаму не се изјаснуваат по ова прашање, па акционерите, вработените во Макпетрол и другите заинтересирани лица сè уште немаат пристап до оваа клучна информација. Не е јасно зошто целата постапка се одвива во тајност, бидејќи надлежните не одговараат и на други важни прашања поврзани со овој случај: дали е склучен договор со „БПХЛ“ и дали е отворена сметка на име на компанијата? Доколку постои банкарската гаранција, до кога е нејзината важност? Што ако истече важноста на гаранцијата, а процедурата сè уште не е завршена? Имајќи ја предвид големината и важноста на Макпетрол, молкот од Централниот депозитар значи дека на јавноста и се ускратени информации од витално значење за македонското стопанство.
Од „Балкан Петролеум“ пред повеќе од два месеца соопштија дека обезбедиле гаранција од швајцарската УБС банка во висина од 47.5 милиони евра, која била доставена во НЛБ банка. Но, ниту од Депозитарот, ниту од НЛБ немаше потврда дека гаранцијата била предадена, што ги подгрева шпекулациите дека процедурите сепак не се целосно испочитувани.
Според информациите до кои дојдоа новинарите-истражувачи, луѓето поврзани со „Балкан Петролеум Холдинг Лимитед“ во минатото се поврзани со матни зделки, а дел од нив се обвинувани за корупција и перење пари. Додека Централниот сепозитар и Комисијата за хартии од вредност си ја префрлаат одговорноста, јавноста сè уште не знае ништо за потеклото на парите со кои компанијата, регистрирана пред само три и пол месеци со почетен влог од само 1.000 фунти, се обидува да ја преземе најголемата македонска нафтена компанија. Од Централниот депозитар за хартии од вредност досега се правдаа со изговори дека не можат да коментираат додека трае постапката. Откако Комисијата ја врати понудата на „БХПЛ“ на доработка поради некомплетна документација, процедурата и натаму трае, а јавноста сè уште ги нема најважните информации – дали „Балкан Петролеум“ има доволно пари за да ги откупи акциите наведени од понудата и какво е потеклото на тие пари.