Авиокомпанијата „Аљаска ерлајнс“, со седиште во Сиетл откажа вчера 41 лет поради големиот облак од вулканска пепел, која ја исфрла вулканот Павлоф.
Вулканот се активираше во неделата попладне, а до понеделник изутрината облакот се прошири североисточно на повеќе од 400 милји во внатрешноста на Аљаска.
Вулканот е еден од најактивните на Аљаска и се наоѓа на 625 милји југозападно од Анкориџ, најголемиот град во сојузната американска држава.
„Аљаска ерлајнс“ соопшти дека денеска ќе обнови 54 од своите летови, доколку има подобрување на условите.
Националната метеролошка служба издаде предупредување до жителите на Аљаска, кои живеат во регионот на вулканот, дека населбите можат да бидат покриени со вулканска пепел, доколку се промени насоката на ветерот, како што се очекува. Предупредувањето важи за три населени места северно и источно од вулканот.