Фудбалската федерација на Македонија (ФФМ) и Љубинко Друловиќ се согласија соработката да не биде продолжена. Друловиќ на позицијата селектор на „А“ репрезентацијата на Македонија дојде во април 2015 година и на пет натпревари забележа само еден нерешен резултат и четири порази.
Според договорот постоеше и можност за продолжување на соработката на уште две години, но исто така стоеше дека цел е Македонија да биде пласирана не подолу од четвртото место.
Македонија квалификациите во групата ги заврши на последното (шесто) место.
– Сакам да им се заблагодарам на Фудбалската федерација на Македонија и на Управниот одбор за соработката и поддршката која сето ова време ми ја даваа мене и на стручниот штаб со цел да бидеме успешни. Исто така, сакам да им се заблагодарам на играчите и искрено на секој од нив му посакувам успех во репрезентацијата и во нивните клубови. Квалификациите за Европското првенство не ги завршивме со пласман до четвртото место, а бидејќи тоа беше еден од условите од мојот договор со ФФМ, нема да ја продолжиме соработката. Како професионалец, за мене резултатот секогаш е мерило за успехот, жал ми е што не остваривме подобри резултати во квалификациите за ЕП 2016. Македонската репрезентација има млади играчи и сигурен сум дека во иднина ќе бидат многу поуспешни. Им се заблагодарувам и на луѓето од стручниот штаб кои го вложија своето знаење и труд за да бидеме успешни. Сигурен сум дека сите на свој начин посакуваа успех и добри резултати. Продолжуваме на различни страни, но и понатаму ќе бидам голем поддржувач на репрезентацијата на Македонија, изјави Љубинко Друловиќ за интернет страницата на ФФМ.
Инаку, Друловиќ веќе од денеска треба да го презеде водењето на белградски Партизан.