Температурите измерени во Македонија во септември годинава биле од еден до четири степени над просечните, а количината на врнежи била поголема за два пати од вообичаеното за овој период.
Информацијата за температурите на воздухот и за количината на врнежи е изготвена според мерењата и податоците од главните метеоролошки станици на метеоролошкиот набљудувачки систем за периодот од 1951 до септември 2015 година.
Минатиот месец, како што информира Управата за хидрометеоролошки работи, се одликувал со значително високи температури. Измерените максимални температури ги достигнале апсолутните вредности на петти и 18 септември. Тогаш се измерени 38,4 степени во Скопје, 38,7 во Гевгелија и 39,7 во Демир Капија. Во Берово, Демир Капија, Крива Паланка, Скопје и Штип биле измерени највисоки септемвриски температури од 1951 година до денес.
Количеството на врнежи, пак, во септември било во граници од 58 до 183 милиметри, што е за два пати повеќе од просечното на речиси сите мерни места. Во Демир Капија и Прилеп наврнал дожд за три пати повеќе, а во Гевгелија за четири пати.