Најбрзиот човек на планетава, Усаин Болт, изрази незадоволство и жалење дека пред почетокот на Светското првенство во атлетика кое ќе се одржи во Пекинг се зборува само за допингот.
Светската атлетска федерација (ИААФ) се наѓа под силен притисок и лавина од критики заради големите допинг афери во кои, според некои медиуми, се замешани и победници на големи натпреварувања, а до тие успеси стигнале под дејство на недозволени стимулативни средства.
Сето ова, според Болт е многу загрижувачко бидејќи спортот ја губи вистинската вредност.
– Тоа сега е во преден план. Последниве недели слушам само за една работа: допинг, допинг, допинг… Главната тема е допингот што е многу жално, вели спринтерот.
Светскиот рекордер го застапува ставот дека атлетиката треба да остане „чиста“, а спортистите треба да се борат и да докажат дека големи резултати се постигнуваат и без стимуланси.
– Јас пред се трчам за себе. Одговорност е наша, наи треба да се погрижиме за својот спорт и да докажеме дека може да се постигнат големи резултати и без лажна сила, додава Болт.
– Тренирав напорно за да бидам добро подготвен и лесно да ги одбранам титулите. Сите знаат дека ова првенство за мене е најважно со оглед на тоа дека сезонава немав најдобри резултати, истакнува рекордерот на 100 и 200 метри.
Претстојното СП се одржува на олимпискиот стадион „Птичјо гнездо“ на кое Болт блесна со своите резултати на ОИ во 2008.